Meer oor ons

Hierdie rustige, veilige huis is in 1971 opgerig vir bejaardes met die behoefte aan ʼn tuiste waar hulle  saam met hul tydgenote hul aftrede veilig en sinvol kan geniet. Die netheid sodra besoekers die perseel betree is opvallend en opknapwerk word gereeld gedoen.

In 1969 reeds het die ACVV onder die besef van die behoefte aan so ʼn veilige hawe gekom. Mev. Grace van Wyk, eggenote van die plaaslike geneesheer, het die leiding geneem om saam met die ACVV beheerbeampte,  Mev. Rosie Schoeman, befondsing van die Departement van Gemeenskapsbou te bekom. Die NG Kerk het die perseel geskenk en  die gebou en 6 woonstelle kon opgerig word.

In 1982 word  verdere uitbreiding beplan; maar eers in 1989 is die bouwerk gedoen en sodoende is meer broodnodige kamers vir verswakte bejaardes en ontspanningsgeriewe voorsien.

Die personeellede is opgelei, sorgsaam en hardwerkend. Inwoners word aangemoedig om so lank fisies moontlik, hulle onafhanklikheid te koester en te behou. Wanneer dit nie meer moontlik is nie, is alle nodige hulp beskikbaar.

Die inwoners  is positief en hou hulself besig met hand- en breiwerk en stokperdjies. Vrywilligers kom speel Bingo, en doen ook oefeninge met die inwoners. Die biblioteek maak gereeld ʼn draai vir ywerige lesers en eredienste word in beeld herlei vanaf die NG Kerk.

Huis Kweekvallei het dit ten doel om aan 55 bejaardes aangename, veilige en bekostigbare huisvesting en versorging en ʼn waardige, sinvolle oudag te bied.